Sampurasun Dulur....
Amit ampun nya paralun
Agungna ka wujud Gusti nu Maha Suci
Jembarna ka para luluhur
Sabuder Alun Ka Ibu agung ka Rama agung
Ka ibu anu teu muguran ka rama anu mugaran,
Deuheus na ka ibu-rama
Nu jadi cukang lantaran urang gumelar di pawenangan
Nyang ga keun sadaya daya
Sasaji sapuratina nampi sari nampa rasa
Pangasih ti ibu pertiwi bumi agung bumi alit
Silokaning pusaka diri
Urang kamanusa nu sarasa
Nusasari titis waris nu sajati
Tos jadi uga nu natrat dina waruga
Gumulung jadi sumsum jadi balung jadi pagal kawasa
Sumujud kanu Maha Agung sumembah kanu Maha Kawasa
Sangkan hudang alam rasana, sangkan nyaring alam pikirna
Salawasna ngadeg ka eling
Manawi bahan katami nyanggakeun kaula
Gusti sadaya daya pangawasa kagungan Anjeuna
Geusan netepkeun dina katunggalan
Wujud Gusti nu Maha Suci,
Mugi Sim Abdi
Jadi jelma anu manut kana rasa
Panceg pageuh lalakon Kahirupan
Dina diri anu cageur,
Dina adat anu bageur,
Dina polah anu bener,
Dina pangarti anu pinter
Sangkan pinanggih tilulur
Rahayu bagja waluya
Hirup waras jati walagri
Nagri sampurna rahayu
Rahayu kersaning Gusti.